Promovohen potencialet turistike të Sharrit

Promovimi i potencialit turistik të Sharrit, ishte qëllimi i tryezës së rrumbullakët të organizuar nga Ministria e Ekonomisë, me pjesëmarrjen edhe të Odës ekonomike turistike të Maqedonisë, kryetarëve të komunave, shoqatave jo-qeveritare dhe përfaqësuesve ndërkombëtarë. "Tema kryesore e tribunës së sotme gjegjësisht dialogët e Sharrit ishte promovimi i potencialeve turistike të Sharrit. Modeli se si do realizohet kjo u diskutua që mundë të jetë partneriteti privat publikë pastaj investime private, partneriteti ndërmjet pushtetit qëndrorë dhe vendorë dhe shfrytëzimi i fondeve të BE-së sidomos në bashkëpunimin ndërkufitar", tha Fatmir Besimi, ministër i Ekonomisë. "Nga sektori privat duam të japim përkrahje për takimet e tilla, ku në një tavolinë të përbashkët u mblodhën përfaqësues të sektorit qeveritar e privat dhe tjera që të thonë mendimin e tyre konkretisht për Kodrën e Diellit. Takime të tilla do mbahen edhe në rajone të tjera dhe kryesorja është se po lëviz diçka për turizmin", thotë Ognjan Cigoski, kryetar i Odës Turistike. "Mendoj se ky është shpirti i vetë këtij takimi sepse mbledhja bashkërisht e të gjithë aktorëve kryesorë domethënë angazhimi i tërë potencialit për zhvillimin e turizmit në këtë rajon", theksoi Ervan Fuere, ambasador i BE-së. Paralelisht me këtë iniciativë në Kodrën e Diellit, po shënohet vija kufitare për shpalljen e një pjese të Malit të Sharrit si Park Kombëtar. "Momentalisht ekspertët janë duke shënuar kufinjtë e parkut nacional të Sharrit, dhe pasi të përfundojë kjo procedurë deri sa mundësojnë kushtet klimatike pastaj do vijojnë procedurat e dokumentimit, dhe hartimi i propozim-ligjit për shpalljen e parkut nacional", pohon Nexhati Jakupi, ministër i Ekologjisë. Në mesin e pesë konkluzioneve që dolën nga ky debat ishte edhe modeli se si do zhvillohet në të ardhmen promovimi i potencialeve turistike të Sharrit.